សាលាឧទ្ធរណ៍ភ្នំពេញ ទទួលដំណើរទស្សនកិច្ចសិក្សារបស់និស្សិត នៃសាកលវិទ្យាល័យ ប៊ែលធី អន្តរជាតិ ចំនួន៥០០នាក់

===========

នៅថ្ងៃចន្ទ-អង្គារ ៧រោច-៨រោច ខែអស្សុជ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី២-៣ ខែវិច្ឆិកា ឆ្នាំ២០២៦ ឯកឧត្តម សេង ស៊ីវុត្ថា ប្រធានសាលាឧទ្ធរណ៍ភ្នំពេញ បានអញ្ជើញជាអធិបតីភាពដ៏ខ្ពង់ខ្ពស់ និងបានផ្តល់បាឋកថា ស្តីពី «តួនាទី និងភារកិច្ច របស់សាលាឧទ្ធរណ៍ភ្នំពេញ» ជូនដល់និស្សិត ជំនាញនីតិសាស្ត្រ នៃសាកលវិទ្យាល័យ ប៊ែលធី អន្តរជាតិ សរុបចំនួន ៥០០នាក់ ដែលមកបំពេញទស្សនកិច្ចសិក្សានៅសាលាឧទ្ធរណ៍ភ្នំពេញ។

ជាកិច្ចចាប់ផ្ដើម ឯកឧត្តម សេង ស៊ីវុត្ថា ប្រធានសាលាឧទ្ធរណ៍ភ្នំពេញ បានមានមតិសំណេះសំណាល និងលើកឡើងអំពីតម្លៃនៃសន្តិភាព ដោយគូសបញ្ជាក់ថា និស្សិតទាំងអស់ដែលបានអង្គុយសិក្សារៀនសូត្រនាពេលនេះ គឺកើតចេញពីការដែលប្រទេសជាតិមាន «សន្តិភាព» ពេញបរិបូរណ៍។ សន្តិភាពនេះហើយ គឺជាគ្រឹះដ៏រឹងមាំ និងសំខាន់បំផុត ដែលបង្កលក្ខណៈសម្បត្តិឱ្យយើងទាំងអស់គ្នាមានឱកាសសិក្សារៀនសូត្រ អភិវឌ្ឍសមត្ថភាពខ្លួន និងចូលរួមចំណែកកសាងសង្គមជាតិឱ្យកាន់តែរីកចម្រើនជឿនលឿនទៅមុខ។ សន្តិភាពដ៏មានតម្លៃនេះ មិនមែនកើតឡើងដោយចៃដន្យនោះឡើយ ប៉ុន្តែវាជាផ្លែផ្កានៃការឆ្លងកាត់ការលំបាក ការលះបង់ និងការបូជាសាច់ស្រស់ឈាមស្រស់ ក្រោមការដឹកនាំប្រកបដោយគតិបណ្ឌិតរបស់ថ្នាក់ដឹកនាំជាតិ ជាពិសេសគឺ សម្តេចតេជោ អតីតនាយករដ្ឋមន្ត្រី ដែលលោកបានប្តូរផ្តាច់តស៊ូបញ្ចប់សង្គ្រាម និងនាំមកនូវសន្តិភាពជូនជាតិមាតុភូមិ។

ក្នុងឱកាសនេះដែរ ឯកឧត្តម សេង ស៊ីវុត្ថា ប្រធានសាលាឧទ្ធរណ៍ភ្នំពេញ បានមានប្រសាសន៍ អំពីការកសាងប្រព័ន្ធតុលាការ ចាប់ពីឆ្នាំ១៩៨០ មកដល់បច្ចុប្បន្ន គឺផ្ដើមចេញពីបាតដៃទទេ ហើយត្រូវបានរៀបចំ និងឆ្លងកាត់ការវិវត្តជាបន្តបន្ទាប់ រហូតមានប្រព័ន្ធតុលាការដូចសព្វថ្ងៃ (សាលាដំបូង សាលាឧទ្ធរណ៍ និងតុលាការកំពូល) និងអំពីប្រវត្តិនៃការបង្កើតសាលាឧទ្ធរណ៍ រហូតដល់មានការបង្កើតសាលាឧទ្ធរណ៍តំបន់។

ជាមួយគ្នានេះដែរ ឯកឧត្តមប្រធាន ក៏បានលើកឡើងអំពី (១) ការកែទម្រង់វិស័យយុត្តិធម៌ ដែលជាចក្ខុវិស័យចម្បង និងអាទិភាព របស់រាជរដ្ឋាភិបាលកម្ពុជា ចាប់ពីអាណត្តិទី២ ក្រោមកិច្ចដឹកនាំដ៏ខ្ពង់ខ្ពស់របស់ សម្តេចតេជោ អតីតនាយករដ្ឋមន្រ្តី និងត្រូវបានបន្តអនុវត្តយ៉ាងម៉ឺងម៉ាត់មកដល់អាណត្តិទី៧នេះ ក្រោមកិច្ចដឹកនាំដ៏ខ្ពង់ខ្ពស់របស់ សម្តេចធិបតី នាយករដ្ឋមន្រ្តី ដើម្បីធានាដល់ដំណើរការដ៏ល្អ នៃការជំនុំជម្រះរឿងក្ដីស្របតាមគោលការណ៍យុត្តិធម៌ នីតិរដ្ឋ និងការគោរពសិទ្ធិ សេរីភាពបុគ្គលដែលមានចែងក្នុងច្បាប់ និងបង្កើនជំនឿទុកចិត្តពីសំណាក់ប្រជាពលរដ្ឋមកលើប្រព័ន្ធយុត្តិធម៌។ (២)យុទ្ធនាការជំរុញ និងពន្លឿនការដោះស្រាយរឿងក្ដី រួមមានសំណុំរឿងគ្រឿងញៀន សំណុំរឿងបទល្មើសចរាចរណ៍ សំណុំរឿងក្មេងទំនើង និងសំណុំរឿងឆបោកតាមប្រព័ន្ធបច្ចេកវិទ្យា កាត់ក្តីឱ្យបានត្រឹមត្រូវ ឆាប់រហ័ស យុត្តិធម៌ ដោយគ្មានអំពើពុករលួយ។

ជាទីបញ្ចប់ ឯកឧត្តមប្រធាន បានមានមតិផ្តាំផ្ញើ និងលើកទឹកចិត្តដល់និស្សិតទាំងអស់ ត្រូវខិតខំប្រឹងប្រែងសិក្សារៀនសូត្រឱ្យបានខ្ជាប់ខ្ជួន ដើម្បីកសាងសមត្ថភាពផ្ទាល់ខ្លួន ក្លាយជាសសរទ្រូងដ៏រឹងមាំសម្រាប់គ្រួសារ និងរួមចំណែកអភិវឌ្ឍសង្គមជាតិនាពេលអនាគត។ ព្រមជាមួយគ្នានេះ និស្សិតទាំងអស់ ត្រូវមានគុណធម៌ សីលធម៌ សុជីវធម៌ និងប្រកបដោយសុចរិត និងស្មោះត្រង់ ចំពោះជាតិមាតុភូមិ និងមានកាតព្វកិច្ចរួមគ្នាថែរក្សាសុខសន្តិភាពដ៏មានតម្លៃដែលមិនអាចកាត់ថ្លៃបាននេះ ហើយដែលសន្តិភាពនេះរកបានដោយលំបាកបំផុតកន្លងមកនេះ។